放鬆

過去一星期，我總共睇左三套話劇，咁樣已經打破左我睇話劇嘅最高紀錄。而三套嘅話劇全是輕喜劇或是音樂劇，真係俾我有足夠嘅能量去應付日常工作。第一套係阿Joe、阿Dee同埋阿君主演嘅，內容係講〝愛〞。人由一出世已經需要愛，到死嗰刻都要。內容真係笑中有淚，有嘢得著。第二套係Gary主演嘅，內容係講一名古羅馬女子怎樣令神勇軍官、富貴財主同埋純情少爺同時著魔，而協助少主人嘅奴隸為左自由，不惜一切協助少主人(包括避過軍官耳目；偷呃拐騙瞞騙財主父親)，達到回復自由身，過程笑料百出，結局喜出望外。而呢套劇最特別嘅地方係包括人物介紹、中場休息後嘅連接方式同埋歌詞嘅內容都有別於其他話劇，真係意想不到。完場後真係忘卻煩憂！而第三套話劇係由新人Angus主演嘅，內容係講回憶嘅，而回憶嘅主要部份係戀愛。整套劇由48首陪我地成長嘅流行曲連貫嘅，當中有很多首歌曲都能觸動心靈。就係呢一百二十分鐘嘅音樂旅程，將埋藏係心靈深處遺忘已久嘅感覺，再次細味欣賞，回復戀愛嘅感覺。好在係過去一星期睇左呢三套話劇，如果唔係我諗我真係人都癲！

即興

即興約朋友食飯真係幾講運氣。今日放工即興約左個朋友食飯，咁啱佢又想搵人訴苦，咁就嗱嗱聲將手頭做緊嘅文件放入櫃，即刻走人。原來朋友係比佢嘅同事激死，同事將客戶重要嘅文件做錯，要朋友善後，而同事嘅態度又懶洋洋，激到朋友死下死下，真係黑狗偷食白狗當災。最終朋友係發脾氣提早收工(提早嘅意思係準時收工)。當我地見到面之後，佢就話要去買嘢，我心諗唔通佢要買嘢發洩，好在佢只係想買支唇彩，不過最終唇彩買唔到，而係買左支香水，都係買左心頭好。咁樣朋友先叫順返條氣！跟住我地去左一間法國餐廳食飯，我地叫左個4 course食，我地食完個前菜，飲完個湯之後，已經覺得有飽肚嘅感覺，最終個主菜係剩下配菜，而朋友亦都係一樣，因為真係有點頂到上喉嚨嘅感覺。而我地都係第一次有呢個嘅反應。最終大家嘅甜品(我係梳乎厘加雲尼拿雪糕，而朋友係法式燉蛋)都係食唔哂！(真係對唔往我地最愛嘅甜品)。因為太飽嘅關係，我地係要window shoping嚟幫助消化。哈哈！！今晚真係可以飽睡。

知心友

今晚同一位知心友食晚飯，原來大家係同一間公司工作(但係唔同部門)，那份友誼真的可以沒有利益衝突(真的因為投契而開始)。因為係同一部門工作的同事，雖然每天閒話家常，但真正是知心友真的沒有很多，因為大家存在利益衝突，只有少數同事是沒有的(因為大家都是一同成長)。而最近幾年公司真的變化很大，以前的感覺是一家人，現在大家真的是〝各家自掃門前雪〞，更有些是〝講一套，做一套〞，係A面前講B嘅壞話，但係B面前就講A嘅壞話，真的要離他們遠一點，因為隨時〝死左都唔知〞。