極速緋聞

一睇到宣傳短片，我唔係俾車太鉉吸引，而係個小童星〝王錫玄〞。佢果把曲髮真係Q，而且表情得意，尤其係回應佢亞爺(即車太鉉)嘅表情真係無得頂(首先向你微笑說好，然後就即時收回笑容，目光呆滯，非常頂癮)。而當佢穿得非常靚靚咁返學，又非常紳士，頭髮恤得非常貼服，真是一個小紳士。另外佢嘅鋼琴演奏那一場真係出乎意外，我真係有懷疑過唔係佢自己本人彈奏或由剪接而成。而佢有好多小動作都非常可愛。

而佢嘅媽媽(朴寶英)唱歌亦非常動聽，就算唔睇字幕亦能感受到她的情感和意思。原來媽媽參加歌唱比賽是有原因的，最終亦如她所願，亦係這個原因令到佢爸爸(車太鉉)墜入緋聞中。

最後講返亞爺(車太鉉)，佢嘅演出一如以往，身體動作非常多，而佢做家務嘅情境非常好笑。所以唔可以接受佢係套電影入面係型男(因為太多型男相穿插鏡頭)。哈哈!

係尾二幕入面，深深感受到做爸爸嘅偉大和做爺爺的著急。尤其係三人重逢那一場真係睇到眼濕濕。

而最尾一幕表演，各人亦盡其本份，各展所長。而女婿的出現亦令故事有個完美結局。

最後帶著愉快嘅心情離開電影院。